Klarspråk-prosjekt

Kompliserte saksfelt og krav til fagleg presisjon fører til at den skriftlege kommunikasjonen kan bli tung og omfattande. Fylkesmannen i Rogaland ynskjer å gjere noko med dette i form av eit eige språkprosjekt våren 2012.

- No har vi fått stadfesta at vi er ei av seks kommunar som blir med i klarspråkprosjektet, saman med kommunane Hjelmeland, Sandnes, Stavanger, Strand og Time, seier ein glad informasjon- og næringssjef Anne Berit Berge Ims i Randaberg kommune.

Skal vere gode føredøme
Klarspråkprosjektet handlar om at det offentlege har eit særleg ansvar for å stå fram som gode føredøme når det gjeld å bruka eit godt og klart språk. Betre skriftleg dialog med kommunane skal byggje på ein gjennomgang av ulike brev og tekstar som Fylkesmannen har sendt til kommunane. Seinare i vår skal kommunane og Fylkesmannen gå gjennom desse tekstane.

- Vi vonar at både Fylkesmannen og kommunane sine byråkrater lærer noko av ein slik gjennomgang, og at dei deretter kan uttrykke seg tydelegare i den skriftlege dialogen med innbyggarar og andre, seier Anne Berit Berge Ims.

Tåkeprat
Døme på tåkeprat, henta frå ei offentleg utgreiing: «Vi håper at utvalget har lyktes med å legge til grunn et gjennomgående perspektiv hvor forløp og systemer ses i en helhetlig sammenheng.»

Fylkesmannen slepp ikkje unna denne gongen heller, sidan det i samband med invitasjon til dette prosjektet blir nytta overskrifta "Tentativt program for arbeidsmøtet" ... i staden for å skrive "førebels program ...".